عمرك سمعت عن عربية فيت 128 تطورت إلى بي ام دبليو ؟ طب عمرك ركنت عربيتك ورجعت
الصبح لقتها تكاثرت وبقت عربيتين ؟ :'D بالتأكيد لا ، ليه بقى ؟ أقولك: علشان حاجه
اسمها (الحياة) أنت كائن حى بتتطور وتتكاثر حتى الآن ده أفضل تعريف للحياة. بص
يابنى الحلال وركز (علشان فيها نوبل دى ) إحنا منعرفش العملية الى حولت المادة
الغير حية إلى مادة حية ، لان لا يوجد سجل أحفورى أو جيولوجى للأرض للفترة الى
بتسبق 4 مليارات سنة. عمر الأرض 4.6 مليار
سنة طبعا عرفنا الكلام ده من دراسة العناصر المشعة. المهم الحياة غالبا بدأت فى
أول 600 مليون سنة ، الى احنا منعرفش عنهم ايوتها حاجه ، اشطا ؟
علماء
الحفريات بيقولوا إن الحياة يفترض أنها تظهر على الأرض منذ 3 مليار سنة مضت ،
تعالى نتبع المنهج العلمى بتاع الملاحظة والأدلة والتجربة علشان نعرف الحوار ده.
منذ أقل من 3 مليار سنة كده بدأت كميات وفيرة من الأكسجين فى الظهور فى الغلاف
الجوى ، خلينى اقولك إن الأكسجين ده كارثة ، لأن الأكسجين بيعزز الصدأ البطىء للصخور الغنية
بالحديد ، ياريتها جاءت على كده ، لو كان فيه كائنات اولية موجودة الأكسجين كان
هيتفاعل مع الجزيئات البسيطة الى بتعتمد عليها كغذاء وبالتالى هى هتموت، إلا اذا
تكيفت مع الأكسجين. من الأخر الحياة مفروض تبدأ قبل وجود الأكسجين فى الغلاف الجوى
مش بعد وجود الأكسجين اشطا ؟
عارف والله إن معدة الحيوانات بما فيها
الإنسان بتحتوى على مليارات الكائنات التى تعيش فى بيئة خالية من الأكسجين وبتموت
لو أتعرضت للهواء.
الأكشن يبدأ لما تعرف إن الفترة الى العلماء
حدودا إن الحياة مفروض تبدأ فيها ، كانت فترة القصف ، بختصار الأرض كانت ملشطة ،
الجسيمات المتبقية من تكوين النظام الشمسى بدأت تسقط فى الأرض ، اشطا ؟ الحلو بقى
إن أغلب المواد الساقطة على الأرض تكونت من المذنبات ودى فى جوهرها كرات جليدية
ضخمة محملة بصخور و أتربة دقيقة ، ((ثلج )) المذنبات كان عبارة عن ماء متجمد وثانى
أكسيد الكربون المتجمد. المذنبات كان فيه برضه شوية ميثان ونشادر وكحول الميثيلى و
سيانيد الهيدروجين والفورمالدهايد وليلة كبيرة أوى سعتك. متفرحش أوى ، لو كانت فيه
حياة كانت المذنبات دى هتقضى عليها أصلا فى فترة القصف ، وفيه شوية أدلة بتقول إن الحياة
بدأت وانتهت أكثر من مرة على هذا الكوكب.
المنهج العلمى بيحب التجارب أوى ، اه والله ،
الاستاذ داروين ربنا يسامحه خمن إن الحياة ممكن تكون بدأن فى بركة أو أحواض المد ،
المهم فيه 2 علماء عملوا تجربة لذيذة
خلاصتها إنهم جابوا ازازة :'D
وضبطوها بحيث تحاكى الظروف الموجودة داخل بركة
مياة افتراضية مبسطة للغاية موجودة على كوكو الأرض المبكر ، اشطا ؟
النتائج: تكون مادة عضوية ، مركب من جزيئات
عديدة معقدة ، من بينها انواع مختلفة من السكر إلى اثنين من أبسط الأحماض الأمنيية
، الادنين والجوانين ، وكمان التجربة نجحت فى تكوين (النيوكلوتيدات الى بتعتبر
الوحدة البنائية للحمض النووى ) ولكن السؤال متجاوبش برضه ، ازاى الجزيئات دى
تحولت إلى شىء حى ؟
فى اكتشاف فى عام 1977 العلماء لقوا أن فى
كائنات بدائية وديدان فى طول الإنسان بتعيش من غير ضوء الشمس فى أعماق المحيطات ، الكائنات دى بتعيش على
الطاقة الحراية الناتجة من التحلل الاشعاعى للعناصر زى الالومنيوم 26 و البوتاسيوم
40، ايوه والله زى ما بقول سعتك كده مش لازم تكون الشمس هى أساس قيام الحياة ، المهم مصدر للطاقة اى مصدر
للطاقة ، اشطا ؟
وده بياخدنا للسؤال الأخير هل يوجد حياة داخل
النظام الشمسى فى بيئة متطرفة للغاية بس احنا مش قادرين نشوفها ؟ للاجابه على هذا
السؤال تابعونا فى الحلقة القادمة :'D
تعليقات
إرسال تعليق